بالنسبة للناس اللي بتنتقد المدارس الإنترناشيونال والناس اللي مدخلة عيالها
المدارس دية والله حضرتك أحب أوضح لك كام نقطة كدة
- الناس اللي مدخلة
ولادهم مدارس إنترناشيونال معظمهم ناس عادية جداً مش مليونيرات ولا فلوسهم حرام ولا
بيتاجروا في السلاح.. حضرتك إحنا معظمنا بيتطحن عشان يجمع فلوس كل قسط وفيه اللي بيعمل
جمعيات وفيه اللي بياخد قرض وفيه اللي شغال ٣ شغلانات في اليوم عشان يعلم ولادة.
- الأب اللي مدخل
ولادة مدارس إنترناشيونال مش بيه بكرش وبيشرب سيجار ولا الأم ليدي معاها ست شغالات
فلبينيات!
- ولادنا الي في
المدارس الإنترناشيونال بيقضوا الويك إند في النادي وسط التمارين وبين بيت جدهم وجدتهم
يعني مبيقضهوش في الديسكوهات.
- إحنا الأهالي
بيوتنا مفيهاش بار ولا مكبرين دماغنا من عيالنا ولا بيرجعوا من مدرستهم يلاقوا مامتهم
سكرانة وقاعدة بتحط منيكير وماسكة مج النسكافية عشان تفوق!
- الأم اللي ولادها
في المدرسة الإنترناشيونال بتطبخ وبتكنس وبتنضف وبيطلع عين اللي خلفوها في مذاكرة عيالها
وبتبقى منكوشة ومبهدله علي فكرة! يعني مش قاعدة عند الكوافير وولادها يرجعوا من المدرسة
يطلبوا بيتزا يتغدوا وبعدها يدخلوا أوضتهم يشربوا سجاير! مفيش الكلام دة والمصحف
- على فكرة رحلاتهم
في دريم بارك وسينما سيتي ستارز يعني مبيروحش في رحلاتهم لاس فيجاس!
- إحنا مش مدخلين
ولادنا مدارس إنترناشيونال منظرة والله بس حضرتك خد لفة كدة علي مناهج الوزارة وانت
تعرف إحنا إختارنا الإنترناشيونال ليه! فا ليه ولادنا يحفظوا لما ممكن يفهموا!
- معندناش أسطى
محمد السواق إطلاقاً! إحنا اللي بنوصل عيالنا وعلى فكرة باصات المدارس دية مش الباصات
الصفرا الشيك اللي بتطلع في المسلسلات! باصات عادية معفنة والله.
- العيال في المدارس
الإنترناشيونال مبيحششوش ولا زمزمياتهم فيها خمرة ولا البنات بتروح المدرسة بالمايوة
البيكيني!
- العربيات اللي
ولادنا بيروحوا بيها المدرسة عادية جداً اه في منها المرسيدس والبي ام بس فيه كتير
جدا ڤيرنا ولانسر وأوبترا ولانوس.
- ولادنا اللي
في المدارس الإنترناشيونال الولاد مش فافي والبنات مش صايعة! عاديين على فكرة
- على فكرة بياخدوا
معاهم ساندوتشات لانشون وجبنة رومي وشيدر عادي! السيمون فيمية دة بنشوفة في ساندوتشات
اون زا ران! والكنتين علي فكرة بيبيع شيبسي كرانشي ولمبادا وكيكة تودو عادي والله!
وأخيراً والله العظيم تلاتة معظم الأهالي اللي مدخلة ولادهم مدارس إنترناشونال
طلعان عينهم في تحويش أقساط المصاريف وفلوس اليونيفورم وفلوس الكتب.. والله العظيم
إحنا بنتطحن عشان نودي ولادنا مدارس يتعلموا فيها التعليم "العادي" اللي
المفروض يكون متوفر.. هتلاقي فينا اللي ممكن يبيع عربيتة ويجيب عربية أرخص عشان يدفع
المصاريف وهتلاقي فينا اللي داخل في مليون جمعية عشان يقدر يدفع القسط وهتلاقي فينا
اللي راكب عربية لادا واللي بيبقي بيلف حوالين نفسة أول ما المدرسة تبعت رسالة فيها
آخر معاد لدفع القسط!
الموضوع بسيط إحنا إختارنا نطحن نفسنا عشان ولادنا ميحفظوش درجة الحرارة كانت
كام أول ما نابليون دخل مصر!
فا نهدى شوية ونبي!
على وول : بسمة السباعى
ليست هناك تعليقات :